أول يوم لمطعمك على تكة: من المنيو والطاولات لأول طلب في المطبخ
الدليل ده لصاحب مطعم بيفتح على تكة لأول مرة وعايز يكون جاهز لأول طلب في نفس اليوم. كل خطوة تحت بتستخدم اللي موجود في النظام النهارده: لوحة تحكم المتجر، وتطبيق الكاشير، وتطبيق شاشة المطبخ.
الخطوة 1: سجّل وافتح الفرع
سجّل من store.ttakka.store برقم موبايلك، اكتب كود التحقق، واختار «مطعم» كنوع النشاط. اختيار النوع مهم: هو اللي بيفتح أدوات المطاعم (الطاولات، شاشة المطبخ، الأكل في المكان وQR الطاولة) ويخفي اللي مش محتاجه.
بعدها معالج الإعداد الأول بيمشّيك في الأساسيات: الشعار، أول فرع ومواعيد شغله، المنتجات، وطرق استلام الطلبات. البيانات الرسمية زي الرقم الضريبي والمستندات، وإضافة فريقك، ممكن تأجلهم لبعدين.
الخطوة 2: جهّز المنيو
من «المنيو والمنتجات» اعمل الأقسام الأول (مقبلات، أطباق رئيسية، ساندوتشات، مشروبات، حلو)، وبعدين ضيف الأصناف في كل قسم بالاسم والسعر. ولو المنيو عندك في شيت إكسل، تقدر تستورده مرة واحدة بدل ما تكتب صنف صنف.
كل صنف في المطعم ليه جزء اسمه «المطبخ» فيه 3 حاجات شاشة المطبخ بتقراها:
- بيتعمل فين؟ شاشة المطبخ، ولا الكاشير / البار. والافتراضي إن الصنف بيمشي زي القسم بتاعه.
- نوع التغليف: سخن، بارد، مشروب، صوص، أو حلو، عشان الفريق يفصل الأكل السخن عن البارد والمشروبات وهو بيقفل الطلب.
- مسببات الحساسية: عشان المطبخ يشوفها على التذكرة.
نصيحة: مش لازم المنيو كله يبقى جاهز أول يوم. ابدأ بالأطباق اللي هتقدمها النهارده فعلًا، وكمّل الباقي بعدين.
الخطوة 3: الصالات والطاولات
من «الصالات والطاولات» في لوحة التحكم ضيف أماكن الجلوس والطاولات اللي في كل مكان. لما الكاشير ياخد طلب أكل في المكان بيختار الطاولة، فكل طلب بيفضل مربوط بطاولته لحد ما يتدفع.
ولو طلب QR الطاولة ضمن باقتك، الضيف يقدر يمسح الكود اللي على الطاولة ويطلب من موبايله. الطلب بيوصل للكاشير ومكتوب عليه إنه مستني موافقة، فتفضل انت المتحكم في اللي بيدخل المطبخ.
الخطوة 4: جهّز شاشة المطبخ
نزّل تطبيق شاشة المطبخ من تكة على تابلت في المطبخ، وادخل بحساب موظف ليه صلاحية المطبخ. الطلبات بتظهر في 3 أعمدة: «جديد»، «قيد التحضير»، و«جاهز». ولو المطبخ فيه أكتر من شباك تحضير، عرّف الشبابيك على الفرع عشان كل شباك يشوف أصنافه بس. وتقدر كمان تطبع تذكرة المطبخ من نفس التطبيق.
الخطوة 5: الطابعات والدرج
- من «الفروع والأجهزة» ثم «الفواتير والطابعات» جهّز شكل الإيصال وشوف المعاينة قبل أول بيعة.
- على الكاشير، وصّل طابعة الإيصالات بالبلوتوث أو الشبكة.
- افتح وردية على الكاشير واكتب الفلوس اللي بادئ بيها الدرج.
الخطوة 6: أول طلب
- على الكاشير اختار نوع الطلب: طاولة، تيك أواي، أو توصيل.
- دوس على الأصناف. وتقدر تكتب ملاحظة على السطر، زي «من غير بصل»، وهي بتمشي مع الطلب.
- ابعت الطلب. أصناف المطبخ بتظهر في شاشة المطبخ تحت «جديد»، وأصناف الكاونتر لأ.
- لما الضيف يدفع، اختار طريقة الدفع (كاش، كارت، وباقي الطرق اللي مفعّلها في محلك) واطبع الإيصال.
الاسترجاع والإلغاء بيطلبوا رقم تأكيد المدير، فغلطة أول يوم ما تتحولش لعجز في الدرج.
الخطوة 7: قفل اليوم
لو دفعت حاجة من الدرج خلال اليوم (عيش، أنبوبة، فاتورة مورد)، سجّلها على الكاشير كـ«صرف نقدي» على الوردية المفتوحة، عشان حساب الدرج يطلع مظبوط. وآخر اليوم:
- اقفل الوردية من الكاشير.
- اقرا تقرير Z: رصيد البداية، مبيعات الكاش، المرتجعات، الإيداع والصرف.
- من لوحة التحكم افتح «التقارير والتحليلات» عشان تشوف مبيعات اليوم وتقرير المطبخ.
بعد أول يوم
لما أول يوم يعدّي على خير، اقرا دليل شاشة المطبخ، ودليل الطلب بـQR الطاولة، ودليل خزينة الفرع عشان تتابع مصاريفك بالتصنيف.
كتبها فريق تكة · دليل أول يوم
بالتعاون مع فريق تكة
محتاج أجهزة لمحلك؟
تابلت وطابعة وسكانر وميزان — باقات جاهزة تشتغل مع تكة من أول يوم.
شوف باقات الأجهزةأسئلة شائعة
أقدر أوقف صنف خلص النهارده؟
آه، من «قائمة الإيقاف» في لوحة التحكم. تقدر تعلّمه «خلص النهارده» وتحدد ميعاد رجوعه، فيختفي من الكاشير ومن تطبيق العملاء لحد الميعاد ده.
لو النت فصل وقت الشغل يحصل إيه؟
كاشير تكة بيكمل ياخد طلبات أوفلاين، وبيرفعها على السيرفر أول ما النت يرجع.
لازم كل الأصناف تروح لشاشة المطبخ؟
لا. لكل صنف بتحدد هو بيتعمل فين: شاشة المطبخ، ولا الكاشير / البار. الأصناف اللي بتتعمل على الكاونتر، زي الكانز، مش بتظهر في شاشة المطبخ.